Puzzle Jahresend-„Versli“ – 2018 im Rückblick

Andreas Odermatt

👋2⃣0⃣1⃣8⃣👋
Die Weihnachtstage sind vorbei und somit auch schon fast das Jahr 2018. Bereits klopft 2019 an unsere Türen. Zeit, um einen Blick zurück auf unser Jahr 2018 zu werfen. Bei Puzzle machen wir das traditionellerweise in Reimform und auf Berndeutsch (meistens). Viel Spass!

(Ändu) Hallo zämä! I freue mi sehr, euch öpis zu «Skill up!» z verzeue. Ändlich isches so wit.

(Tru) Hey nei Ändu, Stopp!!! Äs isch doch iz Värsli Zyt!

Letscht Jahr hanis ja ällei müäsä mache, läck isch mir das uf d Närvä,
hie, nim di Zetlä u Chappä, u verzeu du dasmau die Värsä!

(Ändu)
Ou ja stimmt, wie ha ig das nur chönnä vergässä!
Mit sore Tradition wei mir dänk sicher nid afa brächä!

Drum gits iz haut anstatt derä Projekt-Brichterstattig,
Ä Jahresrückblick nach dr beschtä Puzzle-Gattig!

Im 2018 isch Historisches passiert, imfau würklich wahr!
Ganz generell isch SOOO viu los gsi i däm verrückte Jahr.

Dir Members, dir sit Puzzles Härz, Seelä und ou z Gsicht,
Drum isch das vorauem euch aunä gwidmet, das Sammelsurium vo chlinä Gedicht.

Auso tüe mir iz anstatt no meh Folie düre z klicke,
Mit euch aunä zämä uf die super Momänte vom 2018 zrügblicke!

Z Jahr het mit dr 100 Members Party scho fulminant gstartet,
Äs Puzzle-Fescht wies im Büechli steit, luschtig gsi u numä äs birebizeli usgartet.

Ou süsch heimers wieder a viunä Fyrabebier, Apéros und Events la krache,
Mängisch geits so ab, da muesch früecher usem Zug usstige, süsch vergeit dir z lache!

Und das Jahr hei mir mitem Puzzle-Huus üsi Company ou ändlich visualisiert,
das chunnt guet a, aber natürlich wird z fausche Java Logo vo üsnä Engineers kritisiert.

Ou d Läsbarkeit vo andere Logo-Entwürf het paar Fragezeiche kreiert,
«By Puzzle ITC up! Skill», ja das verstöh mir, dass das irgendwie chli irritiert.

Aber zum Glück hei mir ja ä läbändigi und offnigi Kultur u akzeptiere Kritik,
So gits bir Zufriedenheitsumfrage bereits Feedbacks zur Fragetechnik.

Kommunikation isch de ou bsunders wichtig, das Thema begleitet üs ja sit ewig
Aber bi so viunä Chat-Kanäu hesch mängisch haut scho z Gfüehl, sigsch mitte in Venedig.

Wöu mä mängisch nid aus cha läsä oder haut mau öpis zwüsche abe gheit,
Hange jetzt Screens überau und infomiere di drüber was bi Puzzle so aues geit.

Wosch du Puzzle News aber nid uf Ego am Biudschirm konsumiere,
darfsch natürlich witerhin ou gärn ab und zue äs paar Minute fürnes Getränk mit Members ar Bar investiere!

U we mau länger ar Bar bisch gsi aus geplant und am nächstä Tag lieber tuesch rehabilitiere,
Ou we dir vilicht nid aui gfaue, dänk dra, d Abwäsäheitsmäudige muesch aktiviere!

Hesch grad nid so duurscht gits zum Glück ou angeri «social activities»,
Chasch chli puzzlä, ä rundi Heblä, Pfiile wärfä, Bierbraue – Puzzle bietet würklich «endless possibilities».

Bi üs gits T-Shirts, Jäggli, Hooddies, Chappä, Haustüecher, mir hei für aui öppis da,
Gli gründe mir gloub eifach no d Puzzle Streetwear GmbH!

Mir finges immer wieder cool, wie dir Puzzle-Merchandise tüet mitenand kombiniere,
U euch so ou stets gägä ussä mit Puzzle tüet identifiziere!

Biergläser, Powerbanks, Kaffetasse, Drybags, Tüechli – mir rüehre mit dr grosse Cheue!
Au die wunderbare Sache chasch bim Gadget-Paradies im MarKom bsteue.

U ja, mir si iz ou erprobti Füüralarm-Puzzler u tüe das Gebäude brav evakuiere,
Usser üse CEO und CFO, die ghöres nid oder wei eifach nid use. Ganz schlächti Maniere!

Ein historischer Moment, Puzzle wird international!
Für uns war dabei klar, Deutschland ist bei diesem Schritt die 1. Wahl.

Und auch die Tüüütsche werden wir mit dem Puzzle Virus infizieren.
Der Erfolg wird auch im grossen Kanton kommen, das können wir quasi garantieren!

Aber paarne gfallts laaider nümme z Bern bi Paaaazl,
Drum reisets jetzt ab die Seck. Und zwar nach Baaaasel!

Für üs aber ä Grund zur Freud, wöu dämfaus gits hoffentlich scho gly,
Ä legendäri Gründigsparty für Paaaazl Baaaasl irgendwo am Rhy.

Ou z Züri simer iz ä richtige Puzzle-Hordä,
isch schnäu gange wie mir ar Limmat si grösser wordä!

Iz hets aber no grad ä chlini Pousä gä bim wachsä und büglä,
Üsi Züri Gspändli hei vor Jahresänd haut no rasch müäsä ad Limmatstrass zügle.

Ou z Bärn si üsi Rümlichkeite immer wieder äs Thema,
Bi üserä Wachstums-Dynamik wird das äuä zumnä gängige Schema.

Wöu chum simer i die Bäupstrass izogä isches scho wider äng.
Drum heimer dänkt, mache mir churzä prozess. Wäg mit denä Wäng!

Mir hei iz zwar würklich z weni Sitzigszimmer, klar das chamä reklamiere,
aber hey, gsehs positiv, du chasch sä derfür gli scho mit bookAR reserviere.

Natürlich isch ou Business-sitig extrem viu gloffe,
Zum Bispiu dass mir mit üsem Angebot bir SBB-WTO vou iz Schwarze hei troffe!

Technologiepartner vor SBB z si, das het scho no Stiil,
Entsprächend heimer das gfiiret, unterwäx im historischä Rotä Pfiil.

Ou süsch chöi mir nur aunä Members ganz fescht gratuliere,
Für die super Büez i dä Projekt, bim Chunde betreue und ou bim Ufträg akquiriere.

OpenShift, Kubernetes, CI/CD, Kafka…Technologie isch vou üses Ding,
Drum mache mir iz ou offiziell umfassends High-End-Tech-Consulting.

Ou üsi Open Source Lösige tüe mir iz strategisch witer hegä u pflegä,
und so die super Produkt ufnes nächschts Level ufähebä!

Hesch ghört? Zum äs Sandwichli oder Kaffi choufä bruuchsch iz nümme FIAT-Gäud,
die News über dr Lightning-Self-Order Point isch extrem schnäu um d Wäut!

Überau ufem Globus het mä über das Reckless-Team brichtet und diskutiert,
Das Team wo dir näbscht Healthy Food neu ou äs Lightning-Bier serviert.

U wöu Puzzler iz Cryptos bruuche zum eis ga z zieh,
Chasch iz bi Puzzle di Lohn ou teilwiis in Bitcoins bezieh.

Ja, mir stöh bi viunä Blockchain Events u Hackathons vou ir Sunne,
Bir Mobi heimer sogar bi dä Challenge Days gwunne!

U härzlich bedanke möchte mir üs natürlich ou für aues bim BBT,
Äs freut üs jeda Tag ufs neue, das wunderbare Agebot bir Puzzle-Bar z gseh.

Näbscht au denä Erfolge si mir aber immer no bescheide u wei üs stetig verbesserä,
Aber so insgesamt gseh ghöre mir bide Techies haut scho zu de kresserä.

Und mit Puzzleness het sich üsi Firmekultur sogar ä bits wit institutionalisiert,
Äs wird viu für üsi Kultur gmacht, mängisch sogar spontan ä Song komponiert.

Drum stosse mir doch a uf äs Jahr voller Fulminanz,
U beände das wie sichs ghört mit gutem Ässä, feine Drinks und öppe no ir Cuba Bar mitemnä Tanz!

Häbet ä geilä, löhts la krache, schöni Feschttäg und «see you soon»!
Im 2019 heisst für Puzzle, ab «to the moon»!

(PS: Um was es sich bei «Skill up!» handelt, erfahrt ihr schon bald im neuen Jahr. 🙂 )

Kommentare sind geschlossen.