„I däm Jahr isch wieder so viu passiert, mä chas fasch nid studiere….
höchschti Zyt lö mirs doch mau la Revue passiere!
Ou das Jahr isch d Puzzle-Truppe wieder gwachsä –
aber wie sichs ghört nid numä anhand vo dr Mönschämassä.
Für üs isch das aus Firma eis vo dä beschtä Zeiche –
we mir nach wie vor spannendi neui Talend chöi erreiche.
Ou das Jahr isch vou los gsi, öb a Puzzle Lunchs, a Parties, TechLabs oder süsch amne luschtige Event –
öpis womä vo Puzzle ja fasch nid angers kennt.
Mir si präsent gsi a viunä schöne Destinatione –
Schweuemätteli, Paul Klee, Kuba-Bar um mau die wichtigste z betone.
Sogar mit Chunde tüe mir a Parties tanzä und singä –
und wes mues si tüe mir sä ou spät ir Nacht no heibringe.
Nid verzage, eifach d GL frage! Das ghört iz de gli nümme zum guete Ton, –
Puzzle redet intensiv über Säubschtorganisation!
Wöu ja, bi Puzzle gits sit jehär viu Sympathie, –
für Themä wie Lean-Startup oder Holacracy.
Bi Puzzle si mir würklich gägäüber auem offä –
so hei mir ou chönne hitobito SpinOffä.
Z erwähne isch no dr Launch vo APPUiO, üsi Container Plattform
das Teil isch so geil, das isch scho fasch di neui Norm.
Ou AMW darf nid fähle, Of-Course, wöu ou di lösig isch sid neuschtem Open-Source
U natürlich d riesä Dank a aui Puzzler wo i Projekt u Mandat jedi Herusforderig meischtere –
und so üsi Chunde tagtäglich ufs neue tüe begeischtere.
U gli scho steit üs ä witeri grossi Veränderig bevor, –
Puzzle schliesst am Eigerplatz ihri Tor.
Äs steckt viu Puzzle Gschicht i denä Gäng –
aber äbä, mir wüsses aui, äs wird langsam äng.
Ar Bäupstrass chöi wieder meh z Zwüschämönschliche pflegä –
öpis wo Puzzle ou i Zuekunft auerhöchschte Wärt wird druf legä.
Abschied näh tuet haut scho weh –
aber Bandruum, Duschi, u Begägnigszone wird legendär, wirsch scho gseh!
Aber luege mir iz mit viu Zueversicht u Optimismus i das neue Jahr –
gäbä wider aues, si aktiv u nämä üsi Chancene wahr.
Dr Markt isch nid immer eifach, u d konkurränz mängisch cooler, hipper oder kresser –
aber ja, mir bliebe ruhig u wüsse genau, bi Puzzle, mache mir d IT haut eifach besser.
Bi Puzzle si haut scho aui chli usem gliche Houz –
für die Budä z schaffä macht üs aui Stouz.
Uf derä solidä Basis chöi mir im 2017 witer ufbouä –
das dank dr super Wärtschetzig, Freiheitä u äm gägäsitige Vertrouä.
So iz isch fertig mit däm huere Gliir –
machä mr das wo Puzzle am beschtä cha: Ab iz Bier!“